ಇಂದಿನ ಕಾಲದಲ್ಲಿ ಮಕ್ಕಳು ಬೆಳಗ್ಗೆ ಎದ್ದಾಗಿನಿಂದ ರಾತ್ರಿ ಮಲಗುವವರೆಗೆ ಮೊಬೈಲ್, ಟ್ಯಾಬ್ಲೆಟ್ ಅಥವಾ ಟಿವಿ ಪರದೆಗಳ ಮುಂದೆಯೇ ಕಳೆದುಹೋಗುತ್ತಿದ್ದಾರೆ ಅಲ್ಲವೇ? "ಹೊರಗಡೆ ಹೋಗಿ ಆಟವಾಡು" ಎಂದು ನಾವೇ ಬೆನ್ನು ಬಿದ್ದರೂ, ವಿಡಿಯೋ ಗೇಮ್ ಬಿಟ್ಟು ಕದಲುವುದೇ ಇಲ್ಲ. ಆದರೆ, ಬಾಲ್ಯದಲ್ಲೇ ಮಕ್ಕಳನ್ನು ಮೈದಾನಕ್ಕೆ ಇಳಿಸುವುದು, ಕ್ರೀಡೆಗಳಲ್ಲಿ ತೊಡಗಿಸುವುದು ಕೇವಲ ಒಂದು ಹವ್ಯಾಸವಲ್ಲ; ಅದು ಅವರ ಜೀವನ ರೂಪಿಸುವ ಗಟ್ಟಿ ಬುನಾದಿ.ಸಣ್ಣ ವಯಸ್ಸಿನಲ್ಲೇ ಮಕ್ಕಳನ್ನು ಕ್ರೀಡೆಗೆ ಸೇರಿಸುವುದರಿಂದ ಅವರ ಬದುಕಿನಲ್ಲಿ ಏನೆಲ್ಲಾ ಬದಲಾವಣೆಗಳಾಗುತ್ತವೆ ಎಂಬುದನ್ನು ನಾವಿಲ್ಲಿ ನೋಡೋಣ:ಓಟ-ಆಟದಲ್ಲಿದೆ ಆರೋಗ್ಯದ ಗುಟ್ಟುಟಿವಿ ಮುಂದೆ ಕೂತು ಚಿಪ್ಸ್ ತಿನ್ನುವ ಬದಲು ಮೈದಾನದಲ್ಲಿ ಓಡಿ ಆಡುವುದರಿಂದ ಮೂಳೆ ಮತ್ತು ಸ್ನಾಯುಗಳು ಬಲಿಷ್ಠವಾಗುತ್ತವೆ.ಇತ್ತೀಚಿನ ದಿನಗಳಲ್ಲಿ ಮಕ್ಕಳಲ್ಲಿ ಹೆಚ್ಚಾಗುತ್ತಿರುವ ಬೊಜ್ಜು ಮತ್ತು ಸೋಮಾರಿತನಕ್ಕೆ ಕ್ರೀಡೆಯೇ ಅತ್ಯುತ್ತಮ ಮದ್ದು.ಚೆನ್ನಾಗಿ ಬೆವರು ಹರಿಸುವುದರಿಂದ ರಾತ್ರಿ ಮಲಗಿದ ತಕ್ಷಣ ಗಾಢವಾದ ನಿದ್ದೆ ಬರುತ್ತದೆ, ರೋಗನಿರೋಧಕ ಶಕ್ತಿಯೂ ಹೆಚ್ಚುತ್ತದೆ.
ಗೆಲುವು-ಸೋಲನ್ನು ಸಮಾನವಾಗಿ ಸ್ವೀಕರಿಸುವ ಮನೋಭಾವ
ಬದುಕಿನಲ್ಲಿ ಎಲ್ಲವೂ ಅಂದುಕೊಂಡಂತೆಯೇ ಆಗುವುದಿಲ್ಲ ಎಂಬ ದೊಡ್ಡ ಸತ್ಯವನ್ನು ಕ್ರೀಡೆಗಳು ತುಂಬಾ ಸುಲಭವಾಗಿ ಕಲಿಸಿಕೊಡುತ್ತವೆ.ಆಟದಲ್ಲಿ ಸೋತಾಗ ಬೇಸರ ಮಾಡಿಕೊಳ್ಳದೆ, "ಮುಂದಿನ ಬಾರಿ ಇನ್ನು ಚೆನ್ನಾಗಿ ಆಡಬೇಕು" ಎಂಬ ಛಲ ಮಕ್ಕಳಲ್ಲಿ ಬೆಳೆಯುತ್ತದೆ.ಇದು ಅವರಲ್ಲಿ ಒತ್ತಡವನ್ನು ತಡೆದುಕೊಳ್ಳುವ ಮತ್ತು ಸೋಲಿನಿಂದ ಬೇಗನೆ ಚೇತರಿಸಿಕೊಳ್ಳುವ ಮಾನಸಿಕ ಶಕ್ತಿಯನ್ನು ತುಂಬುತ್ತದೆ.
ಸ್ನೇಹ ಮತ್ತು ಒಗ್ಗಟ್ಟಿನ ಪಾಠ
ಒಬ್ಬಂಟಿಯಾಗಿ ರೂಮಿನಲ್ಲಿ ಕೂರುವುದಕ್ಕಿಂತ, ಮೈದಾನದಲ್ಲಿ ನಾಲ್ಕು ಜನರ ಜೊತೆ ಸೇರಿದಾಗ ಮಗು ಹೊಸ ಸ್ನೇಹಿತರನ್ನು ಮಾಡಿಕೊಳ್ಳಲು ಕಲಿಯುತ್ತದೆ.ಒಟ್ಟಿಗೆ ಆಡುವುದರಿಂದ "ನಾನು" ಎನ್ನುವ ಸ್ವಾರ್ಥ ದೂರವಾಗಿ, "ನಮ್ಮ ತಂಡ" ಎನ್ನುವ ಒಗ್ಗಟ್ಟಿನ ಭಾವನೆ ಮೂಡುತ್ತದೆ.ಇತರರಿಗೆ ಗೌರವ ಕೊಡುವುದು ಮತ್ತು ಎಲ್ಲರನ್ನೂ ಜೊತೆಯಲ್ಲಿ ಕರೆದುಕೊಂಡು ಹೋಗುವ ನಾಯಕತ್ವದ ಗುಣಗಳು ತಾವಾಗಿಯೇ ಒಲಿಯುತ್ತವೆ.
ಏಕಾಗ್ರತೆ ಮತ್ತು ಶಿಸ್ತು
ಮೈದಾನಕ್ಕೆ ಸರಿಯಾದ ಸಮಯಕ್ಕೆ ಹೋಗುವುದು, ಕೋಚ್ ಹೇಳಿದ ಮಾತು ಕೇಳುವುದು ಮಕ್ಕಳಲ್ಲಿ ಅಲಿಖಿತ ಶಿಸ್ತನ್ನು ಮೂಡಿಸುತ್ತದೆ.ಆಟದ ಮೇಲೆ ಇಡುವ ಗಮನವು ಅವರ ಓದಿನ ಮೇಲೂ ಧನಾತ್ಮಕ ಪರಿಣಾಮ ಬೀರುತ್ತದೆ. ಇದರಿಂದ ನೆನಪಿನ ಶಕ್ತಿ ಮತ್ತು ಏಕಾಗ್ರತೆ ಹೆಚ್ಚುತ್ತದೆ.
